Kaup Icelandic umbúða ehf. á Valdimari Gíslasyni hf.

Hinn 13. mars 2006 barst Samkeppniseftirlitinu tilkynning þar sem fram kemur að Icelandic umbúðir ehf. hafi keypt allan hlut í Valdimari Gíslasyni hf. Af upplýsingum sem fram koma í tilkynningunni er ljóst að samlegðaráhrifa samrunans muni fyrst og fremst gæta við sölu á umbúðum fyrir matvæli, svo sem kjöt og fisk. Þar sem samrunafélögin hafa um árabil séð fyrirtækjum í matvælaiðnaði fyrir umbúðum fyrir bæði kjöt og fisk er ljóst að þau munu styrkja stöðu sína á þessum sviðum viðskipta við samrunann. Athuganir Samkeppniseftirlitsins gefa hins vegar ekki til kynna að samruninn muni hafa skaðleg samkeppnisleg áhrif og taldi því ekki ástæðu til að aðhafast frekar vegna hans á grundvelli 17. gr. samkeppnislaga.