Samruni KS sölu ehf., Sláturhússins Hellu hf. og Skanka ehf.

Samkeppniseftirlitið hefur haft til skoðunar samruna KS sölu ehf., Sláturhússins Hellu hf. og Skanka ehf. en KS sala ehf. er dótturfélag í 100% eigu Kaupfélags Skagfirðinga svf. Með umræddum samruna eignast KS sala allt að 60% hlut í Sláturhúsinu Hellu og 60% eignarhlut í Skanka. Á viðkomandi mörkuðum málsins felst starfsemi Kaupfélag Skagfirðinga og tengdra félaga aðallega í sauðfjárslátrun á meðan Sláturhúsið Hellu leggur aðallega stund á nautgripaslátrun og grófvinnslu úr þeim afurðum. Starfsemi Skanka felist aðallega í kjötvinnslu en ekki slátrun líkt og hjá Kaupfélagi Skagfirðinga og Sláturhúsinu Hellu og er skörun í starfsemi viðkomandi félaga því ekki mikil. Samkeppniseftirlitið telur að ekki sé ástæða til að aðhafast vegna þessa samruna á grundvelli 17. gr. samkeppnislaga.