Samruni I.Á. Hönnunar ehf. og 3X Technology ehf.

Samkeppniseftirlitið hefur haft til skoðunar kaup I.Á. Hönnunar ehf. á 63,64% hlut í fyrirtækinu 3x Technology ehf. I.Á. Hönnun er fyrst og fremst eignarhaldsfélag og fer það meðal annars með yfirráð í Skaganum hf. Skaginn starfar á sviði hönnunar, þróunar og smíða á tæknibúnaði til matvælavinnslu. Fyrirtækið framleiðir einkum búnað til vinnslu uppsjávarfisks, en jafnframt frysti-, kæli- og hreinsikerfi fyrir aðra matvælavinnslu. 3X Technology starfar einnig á sviði hönnunar, þróunar og smíði á tæknibúnaði til matvælavinnslu. Á fyrirtækið rætur sínar að rekja til framleiðslu véla fyrir íslenskan sjávartútveg en hefur þróast út í alþjóðlegt fyrirtæki fyrir hönnun og framleiðslu á háþróuðum kerfum til bolfiskvinnslu. Að undangenginni athugun og með hliðsjón af gögnum málsins er það mat Samkeppniseftirlitsins að samruninn muni ekki hafa skaðleg áhrif á samkeppni hér á landi. Því er ekki ástæða til að aðhafast frekar vegna samrunans á grundvelli 17. gr. samkeppnislaga.