Ársskýrsla Samkeppniseftirlitsins fyrir 2021 er komin
út. Í skýrslunni er starf eftirlitsins á árinu reifað, en í henni er meðal
annars farið yfir tölulegar upplýsingar, rannsóknir og verkefni á árinu,
málsvarahlutverk Samkeppniseftirlitsins auk þess sem birtar eru áherslur næstu
ára, yfirlit yfir stjórnvaldssektir og margt fleira.
Leitast er við að setja upplýsingar fram á einfaldan
og gagnsæjan hátt en í skýrslunni er að finna fjölda hlekkja sem gefa lesanda
tækifæri til að kafa dýpra í vissa þætti.
Hér má nálgast ársskýrslu Samkeppniseftirlitsins 2021.
Úr inngangi Páls Gunnars Pálssonar, forstjóra:
„Árið 2021 var annasamt í meira lagi. Í skýrslu
þessari er greint frá fjölbreyttum verkefnum þar sem Samkeppniseftirlitið rækti
málsvara- og leiðbeiningarhlutverk sitt með útgáfu fjölda skýrslna, umsagna og
álita, pistla og þátttöku á fundum og ráðstefnum.
Einnig voru miklar annir við rannsóknir mála, en árið
einkenndist af auknu verkefnaálagi vegna rannsókna á tilkynntum samrunum, en
rúmlega þriðjungi ráðstöfunartíma eftirlitsins var varið í samrunamál, í
samanburði við um 20% árin á undan. Stærstur hluti þeirra var afgreiddur á svokölluðum
I. fasa, þ.e. innan 25 virkra daga, en sumir vörðuðu mikilvæga almannahagsmuni
og kölluðu á umfangsmiklar rannsóknir.“
Úr ávarpi Sveins Agnarssonar, stjórnarformanns:
„Við aðstæður sem þessar [áhrif COVID-19 og innrás
Rússa í Úkraínu] er mikilvægt að virk samkeppni fái notið sín og hugað sé vel
that því hvernig breytingar á einstökum mörkuðum geta riðlað
stöðu fyrirtækja og gert nýjum keppinautum erfitt að fóta sig. Öflug samkeppni
kemur einnig í veg fyrir að fyrirtæki velti kostnaðarhækkunum yfir á neytendur
í stað þess að mæta þeim með því að hagræða í rekstri.
Virk samkeppni og festa í framfylgd samkeppnislaga er
vísasta leiðin til að hraða endurreisn atvinnulífs og búa íslenskt hagkerfi
undir þær breytingar sem framundan eru, ekki eingöngu í þeim atvinnugreinum sem
faraldurinn lék hvað verst, heldur einnig á öðrum sviðum, svo sem á vettvangi
stafrænnar starfsemi og aðgerða til að draga úr hlýnun jarðar.“
"*" indicates required fields
