Government's purchase of all shares in Auðkenni approved with conditions

Samkeppniseftirlitið hefur heimilað kaup ríkisins á
öllum hlutum Auðkenni ehf. á grundvelli skilyrða í sátt sem samrunaaðilar gerðu
við Samkeppniseftirlitið. Með sáttinni
skuldbinda samrunaaðilar sig til þess að fara að skilyrðum sem miða að því að
vinna gegn hugsanlegum skaðlegum áhrifum samrunans á samkeppni.

Auðkenni
er fyrirtæki sem veitir rafræna auðkenningar- og traustþjónustu á Íslandi.
Fyrirtækið hefur fram til þessa verið í eigu helstu notenda þjónustunnar. Þeir
stærstu eru viðskiptabankarnir þrír ásamt Símanum hf. Auðkenni hefur þannig starfað á grundvelli undanþágu frá samráðsbanni samkeppnislaga frá árinu
2006 til ársins 2020 þegar breytingar urðu á framkvæmd samkeppnislaga og
sjálfsmat fyrirtækja vegna samstarfs var tekið upp. Með breytingu á eignarhaldi
Auðkennis verður fyrirtækið ekki lengur í eigu keppinauta sem starfa á sama
markaði.

Með sátt samrunaaðila við Samkeppniseftirlitið
skuldubundu þeir sig til að grípa til aðgerða og fylgja eftirfarandi skilyrðum
til þess að sporna við samkeppnishindrunum sem annars gætu leitt af samrunanum:

• Sett eru skilyrði vegna áforma samrunaaðila um stofnun
  svokallaðs ráðgjafaráðs. Í ráðinu sitja fyrrum eigendur og stórnotendur
  þjónustu Auðkennis. Slíkur vettvangur er til þess fallinn að stuðla að mismunun
  á meðal viðskiptavina og skapa hættu á skaðlegum upplýsingaskiptum eða öðru
  samráði á milli keppinauta. Samrunaaðilar hafa skuldbundið sig til að fylgja
  skilyrðum sem vinna gegn þessu, auk þess sem að þeir eru áfram ábyrgir fyrir
  því að tryggja að allt samstarf á
  vettvangi félaganna uppfylli kröfur samkeppnislaga.

• Þegar
  um er að ræða markaði í mótun þar sem stjórnvöld hafa leiðandi hlutverk er
  mikilvægt að tryggja að aðkoma ríkisins takmarki ekki frekari þróun og
  frumkvæði annarra sem vilja hasla sér völl á viðkomandi sviði. Meðal annars af
  þeim sökum er gert að skilyrði að stjórnvöld endurmeti reglulega stöðu sína og
  hlutverk á markaðnum í ljósi mögulegra breytinga. Í þessu sambandi er horft til
  þess að
  ríkissjóður öðlast með samrunanum yfirráð yfir Auðkenni sem hefur undanfarin ár
  haft yfirburðarstöðu í rafrænni auðkenningar- og traustþjónustu á Íslandi. Auk
  þess liggur fyrir að íslenska ríkið er jafnframt eigandi og rekstraraðili
  Íslandsrótar sem gefur út svokölluð rótarskilríki sem eru forsenda
  auðkenningarþjónustu á Internetinu. Þá hefur ríkið og stofnanir þess verið á
  meðal stærstu viðskiptavina Auðkennis.

Við meðferð málsins birti Samkeppniseftirlitið tilkynningu á heimasíðu sinni þar sem markaðsaðilum var gefin kostur á að koma á
framfæri athugasemdum við samrunann. Einnig var óskað sjónarmiða hjá fyrirtækjum
sem starfa á traustþjónustumarkaði og þeim gefin kostur á að koma á framfæri
athugasemdum.

Í ákvörðun eftirlitsins nr. 5/2022 frá 18. febrúar er að finna ítarlegri umfjöllun um
meðferð málsins, þau skilyrði sem sett eru samrunanum og mat á samkeppnislegum
áhrifum hans.