The CAP criteria have proved effective.

Rúmlega tvö ár eru liðin síðan Alþjóðasamtök
samkeppniseftirlita (International Competition Network, ICN) innleiddu
svokölluð CAP viðmið. Þeim er ætlað að tryggja vandaðar rannsóknir og forðast
einsleitni í meðferð mála en Samkeppniseftirlitið uppfyllir skilyrðin og var á
meðal stofnaðila þeirra árið 2019. Samkeppnisyfirvöld í Ástralíu, Bandaríkjunum
og Þýskalandi hafa veitt stýrihópnum sameiginlega formennsku frá upphafi en
kosið er um stjórnarformennsku til þriggja ára í senn. Í dag eru 73 aðilar að
CAP viðmiðunum.

Eftir tvær vikur hefst ársfundur ICN í Búdapest í
Ungverjalandi en á dögunum var gefin út skýrsla um CAP viðmiðin sem voru rædd
sérstaklega á síðasta ársfundi samtakanna, í október 2020. Í skýrslunni er vitnað í Guðmund Hauk
Guðmundsson, verkefnastjóra og alþjóðafulltrúa hjá Samkeppniseftirlitinu, sem
sat pallborðsumræður um CAP verkefnið á síðasta ársfundi ásamt fulltrúum samkeppnisyfirvalda í
Japan, Kanada, Mexíkó og Kenía. Þeir voru sammála um að CAP viðmiðin hafi gefið
góða raun hingað til.

„CAP viðmiðin veita í raun einstaka yfirsýn yfir meðferð
samkeppnismála á Íslandi. Við gerð viðmiðanna gafst frábært tækifæri til að fara
yfir það hvernig best sé að ná fram þeim markmiðum sem CAP viðmiðin leggja
áherslu á auk þess sem yfirsýn næst yfir þær kvaðir sem á eftirlitinu hvíla og
samspils ýmissa íslenskra lagaákvæða. Þá gafst okkur tækifæri til að eiga
samtal við aðila sem voru áhugasamir um virkni málsmeðferðarinnar og vildu vita
meira um viðmið og verkferla eftirlitsins,“ er haft eftir Guðmundi í skýrslunni sem má lesa hér.

CAP viðmiðin eru í stöðugri endurskoðun en þau veita gott
tækifæri til að bera saman verkferla og viðmið hjá samkeppniseftirlitum um
allan heim. Hér má nálgast CAP viðmið Samkeppniseftirlitsins á ensku.

Samkeppniseftirlitið leggur mikið upp úr alþjóðlegu
samstarfi. Markmiðið með því er að efla tengsl samkeppnisyfirvalda innbyrðis
með það fyrir augum að auka þekkingu þeirra sem starfa við rekstur
samkeppnismála auk þess að rannsaka og bregðast við samkeppnislegum álitaefnum
á tilteknum mörkuðum.