Íslenskar orkurannsóknir (ÍSOR) óskuðu eftir undanþágu frá 10. gr. samkeppnislaga nr. 44/2005 á grundvelli 15. gr. sömu laga um að semja sameiginlega við orkufyrirtæki hér á landi um þjónustu á sviði borholumælinga í ljósi erfiðrar stöðu fyrirtækisins í kjölfar efnahagshrunsins. Í bréfi Samkeppniseftirlitsins til ÍSOR var bent á að framangreind samningsgerð gæti farið gegn 10. gr. samkeppnislaga. Fram kom að samkvæmt 15. gr. samkeppnislaga geti Samkeppniseftirlitið veitt undanþágu frá ákvæðum 10. gr. sl. að gefnum ákveðnum skilyrðum. Það leiddi til þess að samningsaðilar gerðu breytingar á fyrri frumdrögum að samningi sín á milli í því skyni að tryggja að samkeppni verði ekki raskað. Samkeppniseftirlitið taldi þær breytingar fullnægjandi og setti efnisatriði þeirra breytinga í samningi sem skilyrði fyrir undanþágu samkvæmt 15. gr. laganna. Með hliðsjón af framangreindu og með vísan til framangreindra skilyrða var undanþágubeiðni ÍSOR frá 10. gr. samkeppnislaga nr. 44/2005 á grundvelli 15. gr. sömu laga samþykkt.
