Kaup Íslandsbanka hf. á hlutafé í Frumherja hf.

Í kjölfar fjárhagslegrar endurskipulagningar á Frumherja hf., veitti Samkeppniseftirlitið Íslandsbanka hf. undanþágu til að framkvæma samrunann á meðan eftirlitið væri með hann til umfjöllunar skv. 4. mgr. 17. gr. a samkeppnislaga nr. 44/2005. Var undanþágan veitt þar sem sýnt þótti að Frumherji gæti orðið fyrir töluverðum skaða ef samruninn kæmi ekki til framkvæmdar þá þegar. Yfirtaka Íslandsbanka á Frumherja telst vera samruni í skilningi samkeppnislaga. Niðurstaða Samkeppniseftirlitisins við mat á áhrifum samrunans var sú að setja kaupum Íslandsbanka á Frumherja ákveðin skilyrði sem m.a. snúa að því að hraða sölu Frumherja frá Íslandsbanka og draga úr mögulegum samkeppnisvandamálum sem leiða af eignarhaldi bankans. Tekist hefur sátt um skilyrðin með Íslandsbanka og Samkeppniseftirlitinu og koma skilyrðin fram í ákvörðuninni.