Kaup Ramma hf. á Sigurbirni ehf

Með bréfi dags. 19. september 2019, var Samkeppniseftirlitinu tilkynnt um fyrirhuguð kaup Ramma hf. (Rammi) á öllu virku hlutafé í Sigurbirni ehf. (Sigurbjörn) Að mati Samkeppniseftirlitsins felur framangreindur gerningur í sér samruna sem er tilkynningarskyldur í skilningi 17. gr. a. laganna.

 Starfsemi Ramma felst í rækjuvinnslu á Siglufirði og fiskvinnslu í Þorlákshöfn. Félagið á frystitogarann Sólberg og fer vinnsla fram um borð í honum. Sigurbjörn starfrækir fiskvinnslu í Grímsey. Þá er heill fiskur endurseldur af bátum félagsins á fiskmarkaði innanlands.

 Í samrunaskrá segir að starfsemi beggja samrunaaðila snúi að útgerð, þ.e.a.s. markaði fyrir veiðar á fiski við Ísland, auk fiskvinnslu og sölu á sjávarafurðum. Starfsemi félaganna sé því á sama sviði og um láréttan samruna að ræða.

 Samkvæmt Fiskistofu um úthlutun heildarafla eftir þorskígildum fyrir fiskveiðiárið 2019/2020, má ætla að eftir samrunann yrði heildaraflamagn samrunaaðila af heildarúthlutun afla slíkt að samruni félaganna leiði ekki til þess að markaðsráðandi staða verði til eða styrkist á markaði fyrir veiðar á botnfiski við Ísland.

 Að gögnum málsins virtum er það niðurstaða Samkeppniseftirlitsins að kaup Ramma á Sigurbirni gefi ekki ástæðu til að aðhafast, s.s. með íhlutun í formi ógildingar eða setningu skilyrða.