Samruni FoodCo hf. og Gleðipinna ehf

Samkeppniseftirlitið hafði til skoðunar samruna FoodCo hf. og Gleðipinna ehf. FoodCo á og rekur veitingastaði undir sjö mismunandi vörumerkjum á höfuðborgarsvæðinu. Gleðipinnar reka Keiluhöllina Egilshöll ásamt veitingastaðnum Shake&Pizza. Dótturfélög Gleðipinna reka veitingastaði undir vörumerkjunum Hamborgarafabrikkan og BlackBox Pizzeria.

Eftir rannsókn málsins var það mat Samkeppniseftirlitsins að samruninn leiddi hvorki til þess að markaðsráðandi staða styrktist né myndaðist, eða yrði til þess að samkeppni á markaði raskaðist að öðru leyti með umtalsverðum hætti. Ekki væru því forsendur til þess að aðhafast vegna samrunans. Ljóst væri þó að staða samrunaaðila væri orðin nokkuð sterk ef horft væri til framkominna upplýsinga um markaðshlutdeild. Kynni sú staða að koma til nánari skoðunar við frekari samþjöppun á markaðnum. Sömuleiðis kynni að koma til þess að markaðurinn fyrir veitinga- og skyndibitastaði yrði síðar skilgreindur með þrengri hætti en nauðsyn hefði þótt fyrir niðurstöðu málsins.