Undanþága fyrir samstarfi lánveitenda um tímabundna greiðslufresti á lánum einstaklinga vegna áhrifa COVID-19

Samkeppniseftirlitið hefur í dag heimilað samstarf lánveitenda sem lýtur að tímabundinni frestun á innheimtu lána einstaklinga sem lenda í tímabundnum greiðsluvanda vegna tekjufalls af völdum COVID-19 farsóttarinnar. Ákvörðunin felur í sér undanþágu frá banni samkeppnislaga við samstarfi keppinauta.

Undanþágan er bundin skilyrðum sem ætlað er að tryggja enn frekar hagsmuni einstaklinga sem lent hafa í greiðsluerfiðleikum. Þannig eiga skilyrðin að tryggja að samstarf lánveitenda komi ekki í veg fyrir að einstakir lánveitendur geti veitt viðskiptavinum sínum frekari greiðsluerfiðleikaúrræði en samkomulagið kveður á um.