Samruni Pennans hf. og Bókaverslunarinnar Andrés Níelsson hf. annars vegar og samruni Pennans hf. og Bókaverslunar Jónasar Tómassonar ehf. hins vegar

Samkeppniseftirlitinu barst tilkynning um að Penninn hf. hefði keypt Bókaverslun Jónasar Tómassonar (BJT) á Ísafirði og  verslunarrekstur Bókaverslunarinnar Andrés Níelsson (BAN) á Akranesi. Af upplýsingum sem fram komu í tilkynningunni var ljóst að samlegðaráhrifa samrunanna myndi fyrst og fremst gæta við smásölu á bókum, tímaritum og skrifstofuvörum. Ljóst þótti að staða Pennans væri almennt mjög sterk á þeim sviðum viðskipta, sem og á markaði fyrir heildsölu á ritföngum, skrifstofuvörum, erlendum tímaritum og erlendum dagblöðum. Var hins vegar ljóst að rekstrarafkoma bókaverslana BAN og BJT hefur verið slæm á undanförnum árum. Í ljósi þessa og með hliðsjón af öðrum gögnum málsins var það mat Samkeppniseftirlitsins að ekki væri ástæða til að hafast frekar að vegna kaupa Pennans á umræddum bókaverslunum.