Samrunamál

Samruni í skilningi samkeppnislaga telst hafa átt sér stað þegar breyting verður á yfirráðum fyrirtækis til frambúðar, svo sem vegna sameiningar tveggja fyrirtækja eða yfirtöku eins fyrirtækis á öðru

  • Untitled-design-38-

Staða samrunamála

Uppfært: 20. maí 2022

Á þessari síðu er hægt að kynna sér stöðu samrunamála sem eru til rannsóknar hjá Samkeppniseftirlitinu. Neðar á síðunni má svo sjá lista yfir mál sem búið er að rannsaka á árinu.

Samkeppniseftirlitið kappkostar að afgreiða mál á eins skömmum tíma og frekast er unnt en eðli málsins samkvæmt geta rannsóknir á fyrirhuguðum samrunum verið flóknar og yfirgripsmiklar. Á meðan rannsókn stendur yfir mega samrunar ekki koma til framkvæmda.

Samkeppniseftirlitið tekur samruna ekki til rannsóknar fyrr en fullnægjandi samrunatilkynningu hefur verið skilað til eftirlitsins. Það þýðir með öðrum orðum að viðkomandi samrunatilkynning sé í samræmi við reglur Samkeppniseftirlitsins um tilkynningar og málsmeðferð samrunamála og inniheldur þar af leiðandi nauðsynlegar upplýsingar um atriði sem geta skipt máli við athugun á samkeppnislegum áhrifum samrunans.

Þegar fullnægjandi samrunatilkynning hefur borist Samkeppniseftirlitinu byrja lögbundnir tímafrestir að líða og þá birtist samruninn á yfirlitinu hér að neðan.

Samkeppniseftirlitið og fyrirtæki geta einnig átt í forviðræðum um samruna til þess að undirbúa tilkynningu og væntanlega málsmeðferð. Slíkar viðræður eru háðar trúnaði og fara fram áður en tilkynningu er skilað og áður en frestir byrja að líða. 

Tímafrestir í samrunamálum

Samkeppniseftirlitið hefur 25 virka daga til athugunar á samkeppnislegum áhrifum samruna eftir að tilkynnt hefur verið um hann með fullnægjandi hætti. Á þessu stigi telst rannsóknin vera á „fasa l.“

Telji Samkeppniseftirlitið ástæðu til frekari rannsóknar á samkeppnislegum áhrifum samruna skal stofnunin tilkynna samrunaaðilum um það. Nefnist sá hluti rannsóknar „fasi ll.“

Skal ákvörðun Samkeppniseftirlitsins um ógildingu eða setningu skilyrða samruna liggja þá fyrir, eigi síðar en 90 virkum dögum eftir að viðkomandi fyrirtækjum var send tilkynning um frekari rannsókn á samrunanum (þ.e. fasa II tilkynning).

Leggi samrunaaðilar, sem óska eftir sáttaviðræðum við Samkeppniseftirlitið, fram möguleg skilyrði vegna samrunans á 55. virka degi annars fasa rannsóknar eða síðar, framlengist frestur til rannsóknar samrunans sjálfkrafa um 15 virka daga.

Óski samrunaaðilar þess er Samkeppniseftirlitinu heimilt að framlengja framangreinda fresti til rannsóknar samruna um allt að 20 virka daga.

Allir tilkynntir samrunar eru rannsakaðir af Samkeppniseftirlitinu með tilliti til þess hvort markaðsráðandi staða verði til eða að slík staða styrkist, eða leiði til þess að samkeppni á markaði raskist að öðru leyti með umtalsverðum hætti. Ef slíkt á ekki við eru samrunar samþykktir án íhlutunar eftirlitsins.

Hér má lesa meira um samruna almennt og hér má nálgast frekari upplýsingar um samrunatilkynningar. 

 

Samrunamál til meðferðar:

Málsnúmer   Samruni

Móttökudagsetning fullnægjandi samrunatilkynningar

Fasi l eða ll   Lok frests á viðkomandi fasa
2204007 Kaup Haga hf. á Eldum rétt ehf. 7. apríl 2022 ll 26. september 2022
2203004
Kaup Rotovia hf. á öllu hlutafé í Promens
2. mars 2022  ll 22. ágúst 2022
2201008 Kaup Ardian á öllu hlutafé í Mílu ehf. 8. febrúar 2022 ll 27. júlí 2022
2112006 Kaup KLS ehf., Regins hf. og Haga hf. á hlutafé í Klasa ehf. 10. desember 2021 ll 25. maí 2022
2108002 Samruni Rapyd og Valitors 29. september 2021 ll Málið er enn til umfjöllunar og niðurstöðu er að vænta innan fárra daga

Samrunamálum lokið 2022:

 Ákvörðun  Samruni
11/2022 Samruni Fagkaupa ehf. og ÍJ ehf. 
10/2022 Kaup Ferðaskrifstofu Íslands ehf. á Heimsferðum ehf.
9/2022 Kaup Gröfu og grjóts ehf. á Steingarði ehf. 
8/2022  Kaup Rubix Íslandi ehf. á öllum hlutum í Verkfærasölunni ehf. 
6/2022 Samruni Nesfisks ehf. og Flatfisks hf. 
5/2022 Kaup Ríkissjóðs á Auðkenni ehf.
4/2022 Kaup Horns IV á 22% hluta í S4S ehf.
3/2022 Kaup Stekks fjárfestingarfélags ehf. á Límtré Vírnet ehf.
2/2022 Kaup Hreinsitækni ehf. á Snóki þjónustu ehf.
1/2022 Samruni Opinna kerfa ehf. og Premis ehf.