Samruni Mest ehf., og Súperbygg ehf.

Í kjölfar umfjöllunar í fjölmiðlum um samruna Mest ehf. og byggingarvöruverslunarinnar Súperbygg ehf. vakti Samkeppniseftirlitið ítrekað athygli félaganna á lögboðinni tilkynningarskyldu þeirra á grundvelli 17. gr. samkeppnislaga. Með bréfi, dags. 10. janúar 2007 var Samkeppniseftirlitinu tilkynnt um samruna Mest og Súperbygg. Samrunatilkynning þessi uppfyllti ekki skilyrði þau sem gerð eru til samrunatilkynninga skv. 17. gr. samkeppnislaga og reglna nr. 880/2005, um tilkynningu samruna. Eftir nokkrar ítrekanir á skyldu aðila til þess að skila inn fullnægjandi tilkynningu lagði Samkeppniseftirlitið, þann 28. mars 2007, dagsektir á fyrirtækin vegna vanrækslu á tilkynningu samruna með ákvörðun Samkeppniseftirlitsins nr. 9/2007. Ný samrunatilkynning barst Samkeppniseftirlitinu þann 16. apríl en var í nokkrum atriðum áfátt. Fullnægjandi tilkynning barst loks í maí 2007. Athugun Samkeppniseftirlitsins leiddi ekki í ljós nein atriði sem bentu til þess að samruninn myndi raska samkeppni. Að mati Samkeppniseftirlitsins er því ekki ástæða til þess að aðhafast frekar vegna samrunans á grundvelli 17. gr. samkeppnislaga.