Kvörtun vegna greiðslutilhögunar á sérfræðiþjónustu lækna

• Sækja skjal
• Málsnúmer: 34/1994
• Dagsetning: 6/10/1994
• Fyrirtæki:
  • Læknastöðinni Álfheimum 74
• Atvinnuvegir:
  • Heilbrigðis- og félagsmál
  • Þjónusta sjálfstætt starfandi heilbrigðisstarfsmanna
• Málefni:
  • Samkeppni og hið opinbera
• Reifun

  Heilbrigðis- og tryggingamálaráðuneytið hafnaði því að veita efnislega umsögn um erindi sem borist hafði frá læknum í Læknastöðinni Álfheimun74. Var því haldið fram af ráðuneytinu að skýring 1. mgr. 2. gr. samkeppnislaga réðist af greinargerð með henni í frumvarpi að lögunum, þannig að merking hennar væri í raun mun þrengri en orð hennar segðu til um. Samkeppnisráð féllst ekki á þetta. Orðalag greinargerðarinnar yrði með vísan til lögskýringarsjónarmiða að víkja að því leyti sem það samrýmdist ekki skýru og afdráttarlausu orðalagi lagagreinarinnar og vilja löggjafans.

  Af ákvæðum samkeppnislaga og ummælum í lögskýringargögnum yrði ráðið að undir lögin féllu opinber fyrirtæki eða fyrirtæki sem störvuðu að einhverju leyti í skjóli opinbers einkaleyfis eða verndar í þeim tilvikum þegar þau hin sömu fyrirtæki stunduðu samkeppnisrekstur og röskuðu samkeppni á markaði þar sem sérfræðingar í læknastétt hefðu haslað sér völl.

  Með vísan til framanritaðs gerði samkeppnisráð þá kröfu að heilbrigðis- og tryggingamálaráðuneytið gæfi efnislega umsögn um ofangreint erindi innan fjögurra vikna þannig að unnt yrði að taka tillit til sem flestra sjónarmiða við úrlausn þess.