Breytingar á yfirráðum í Arcanum ferðaþjónustu ehf.

Samkeppniseftirlitið hefur haft til umfjöllunar breytingar á yfirráðum í Arcanum ferðaþjónustu ehf. Arcanum er ferðaskipuleggjandi sem býður upp á afþreyingu fyrir ferðamenn. Eldey TLH hf. öðlast við samrunann yfirráð í Arcanum. Eldey sinnir fjárfestingum í afþreyingargeira ferðaþjónustunnar og er í eigu fimm lífeyrissjóða, Íslandsbanka hf., Íslenskrar fjárfestingar ehf., auk fjárfesta á vegum einkabankaþjónustu Íslandsbanka. Í máli þessu verður ekki til markaðsráðandi staða og slík staða styrkist ekki, en sett hafa verið skilyrði í málinu sem ætlað er að tryggja samkeppnislegt sjálfstæði framangreindra félaga gagnvart Íslandsbanka. Skilyrðin eru sett í sátt við samrunaaðila og í þeim er einnig mælt fyrir um tiltekna meðferð upplýsinga gagnvart þeim aðilum sem eiga hluti í fleiri en einu fyrirtæki á markaði. Að undangenginni rannsókn Samkeppniseftirlitsins er það niðurstaðan að umrædd skilyrði leysi þá samkeppnisbresti sem ella hefðu stafað af samrunanum.