Verðhækkanir og eftirlit með mögulegum samkeppnisbrestum

Á vettvangi
Samkeppniseftirlitsins stendur nú yfir upplýsingaöflun sem miðar að því að
greina áhrif óhagstæðra ytri aðstæðna á
verðhækkanir á lykilmörkuðum. Eins og kunnugt er hefur á undanförnum misserum
borið á hnökrum í aðfangakeðjunni, vöruskorti, lengri afgreiðslutíma á
innfluttum vörum og verðhækkun hrávöru. Eru þetta m.a. afleiðingar breytinga á
eftirspurn á tímum COVID-19 og nú síðustu vikur afleiðingar af stríðsrekstri
Rússa í Úkraínu.

Þessari þróun hefur fylgt umræða um þörf á
verulegum verðhækkunum, sem að einhverju leyti hafa þegar komið fram. Á
móti hefur verið bent á góða afkomu margra fyrirtækja, auk þess sem styrking á
gengi krónunnar hefur unnið gegn þörf á verðhækkunum á innfluttum vörum.

Upplýsingaöflun Samkeppniseftirlitsins beinist
fyrst um sinn að þróun framlegðar á dagvörumarkaði, eldsneytismarkaði og sölu
byggingarefnis. Miðar vinnan að því að koma auga á mögulega samkeppnisbresti á
viðkomandi mörkuðum.

Að beiðni
menningar- og viðskiptaráðherra tók Samkeppniseftirlitið saman minnisblað um
athugunina fyrr í mánuðinum. Minnisblaðið er aðgengilegt hér.

Framangreind
gagnaöflun er langt komin og stendur úrvinnsla gagna yfir. Samkeppniseftirlitið
mun gera betur grein fyrir athuguninni og niðurstöðum hennar þegar þær liggja
fyrir.