Héraðsdómur Reykjavíkur hefur í dag vísað máli Samkeppniseftirlitsins á hendur Samskipum Holding B.V. o.fl. frá dóminum. Samkeppniseftirlitið höfðaði málið meðal annars í því skyni að fá hnekkt þeirri niðurstöðu áfrýjunarnefndar samkeppnismála að lækka fjárhæð stjórnvaldssektar sem Samskipum var gert að greiða vegna ólögmæts samráðs við Eimskip úr 4.200 milljónum króna í 2.400 milljónir króna.
Rannsókn Samkeppniseftirlitsins á ólögmætu samráði fyrirtækjanna var fordæmalaus að umfangi, en hún tók til allra helstu sviða í starfsemi fyrirtækjanna, þ.e. sjóflutninga, landflutninga og flutningsmiðlunar. Náði rannsóknin yfir háttsemi fyrirtækjanna frá 2008 til og með 2013 en jafnframt til atvika fyrir það tímabil og fól í sér skoðun á gríðarlegu magni gagna. Endurspeglast það í ákvörðun Samkeppniseftirlitsins þar sem niðurstöður um ólögmætt samráð fyrirtækjanna eru rökstuddar á yfir þrjú þúsund blaðsíðum.
Með málsókn sinni leitar Samkeppniseftirlitið eftir því að fá stjórnvaldssekt Samskipa færða í fyrra horf. Ástæða þessa er að Samkeppniseftirlitið telur að sektin sem áfrýjunarnefnd ákvað sé ekki í samræmi við hin alvarlegu og langvarandi brot Samskipa. Í úrskurði héraðsdóms er vísað til reglna dómstólasýslunnar nr. 5/2025 um hámarkslengd stefnu og greinargerða í einkamálum o.fl. og tekið fram að reglurnar feli í sér viðmið sem viðbúið sé að lögmenn og dómarar líti til. Í úrskurðinum er fundið að því að stefna Samkeppnisetirlitsins í málinu sé 135 blaðsíður að lengd og talið að hún feli í sér skriflegan málflutning í andstöðu við bæði meginreglu einkamálaréttarfars um munnlega málsmeðferð og ákvæði laga nr. 91/1991 um meðferð einkamála. Telur dómurinn að svo löng stefna geri Samskipum nær ómögulegt að skila greinargerð sem uppfylli skilyrði laganna.
Samkeppniseftirlitið telur að sakarefni málsins sé fordæmalaust að umfangi og að nauðsynlegt hafi verið að reifa málið með fullnægjandi hætti í stefnu svo það teldist ekki vanreifað. Samkeppniseftirlitð hyggst því kæra úrskurð héraðsdóms til Landsréttar.
"*" gefur til kynna skyldusvið
