Með frétt Samkeppniseftirlitsins
þann 21. júlí og frétt 9. ágúst sl. var gerð grein fyrir rannsókn
Samkeppniseftirlitsins á kaupum fjárfestingarsjóðsins Ardian á Mílu.
Kemur þar fram að Ardian hafi snúið sér til Samkeppniseftirlitsins og óskað
eftir sáttarviðræðum. Eftirlitið féllst á þær viðræður og er markmið þeirra að
kanna hvort tillögur Ardian að skilyrðum geti leyst þau samkeppnislegu vandamál
sem ella stafa af samrunanum.
Samhliða því að óska eftir sjónarmiðum Fjarskiptastofu, viðskiptavina
og keppinauta Mílu um tillögur Ardian hefur Samkeppniseftirlitið átt í
ítrekuðum viðræðum við Ardian. Til þess að skapa ráðrúm fyrir frekari viðræður
hefur Ardian í dag óskað eftir því að Samkeppniseftirlitið framlengi frest þess
til að rannsaka málið. Eins og lýst er í meðfylgjandi bréfi Samkeppniseftirlitsins, dagsettu í dag, hefur eftirlitið fallist á þessa
beiðni Ardian. Frestur til rannsóknar á samrunanum hefur því verið framlengdur
um 20 virka daga, eða til 15. september næstkomandi.
