11. febrúar 2026
Samkeppniseftirlitið hefur komið á framfæri sjónarmiðum vegna samgönguáætlunar, sem nú er til meðferðar á Alþingi. Umsögnin Samkeppniseftirlitsins til umhverfis- og samgöngunefndar Alþingis er aðgengileg hér.
Með umsögninni vekur Samkeppniseftirlitið athygli á leiðum til að efla samkeppni á ýmsum sviðum sem varða samgöngur. Aðgerðir í samræmi við tilmæli eftirlitsins hefðu meðal annars jákvæð áhrif á þróun verðlags á Íslandi til lengri tíma.
Í umsögninni mælist Samkeppniseftirlitið til eftirfarandi:
- Að samkeppnishindranir tengdar vöruflutningum verði teknar til sérstakrar umfjöllunar og gerðar viðeigandi breytingar á samgönguáætlun, með það að markmiði að efla samkeppni í flutningum, bæði land- og sjóflutningum, sbr. m.a. álit Samkeppniseftirlitsins 1/2023 (kafli 2 í umsögninni).
- Að í samgönguáætlun verði fjallað um aðgerðir til þess að draga úr samkeppnishindrunum í flugi til og frá landinu, í samgöngum milli Keflavíkurflugvallar og annarra áfangastaða innanlands. Huga verður sérstaklega að þeirri umgjörð sem rekstri Keflavíkurflugvallar er búinn, sbr. álit Samkeppniseftirlitsins 1/2022 (kafli 3 í umsögninni).
- Að hugað verði að því hvernig opinber innkaup og útboð verði nýtt til að ná fram aukinni hagkvæmni og rekstrarsparnaði við uppbyggingu og viðhald samgöngumannvirkja (kafli 4 í umsögninni).
