Búvörulög – viðbrögð við dómi Héraðsdóms Reykjavíkur

Með dómi Héraðsdóms Reykjavíkur, sem kveðinn var upp í gær, 18. nóvember, er komist að þeirri niðurstöðu að nýlegar undanþágur frá samkeppnislögum, sem heimila kjötafurðastöðvum að sameinast og hafa tiltekið samráð sín á milli, stríði gegn stjórnskipunarlögum og hafi því ekki lagagildi.

Kjötafurðastöðvum ritað bréf

Í tilefni af dóminum hefur Samkeppniseftirlitið í dag ritað kjötafurðastöðvum og samtökum þeirra bréf. Í þeim er vakin athygli á því að samkvæmt dómi héraðsdóms samræmdust undanþáguheimildir búvörulaga ekki stjórnskipunarlögum og öðluðust því ekki lagagildi. Vegna þessa gildi samkeppnislög því fullum fetum um samstarf og samruna kjötafurðastöðva. Hafi kjötafurðastöðvar því ekki notið neinnar undanþágu frá ákvæðum samkeppnislaga.

Jafnframt er vakin athygli á því samkeppnislög banna samninga og samþykktir milli fyrirtækja sem raska samkeppni, sem og samkeppnishömlur af hálfu samtaka fyrirtækja. Einnig er vakin athygli á því að tilkynna þarf Samkeppniseftirlitinu fyrirfram um samruna fyrirtækja yfir tilteknum veltumörkum. Þá leggja samkeppnislög bann við því að samruni komi til framkvæmda á meðan Samkeppniseftirlitið fjallar um hann.

Í bréfunum er eftirfarandi beint til kjötafurðastöðva:

• Að stöðva þegar í stað hvers konar aðgerðir eða háttsemi sem farið getur gegn samkeppnislögum og stofnast hefur til á grundvelli umræddra undanþáguheimilda.
• Óskað er eftir upplýsingum hvort viðkomandi fyrirtæki hafi verið skilgreint sem framleiðendafélag í skilningi búvörulaga, en samkvæmt lagabreytingunum var það forsenda þess að kjötafurðastöðvar gætu nýtt sér undanþáguheimildirnar.
• Hafi viðkomandi kjötafurðastöð ráðist í samruna eða samstarf á grundvelli undanþáguheimildanna er lagt fyrir fyrirtækið að varðveita allar upplýsingar og gögn sem varpa ljósi á þá háttsemi sem í hlut á. Í því sambandi er vakin athygli á því að það getur varðað fyrirtæki stjórnvaldssektum og einstaklinga refsingu að koma undan eða gera á annan hátt ónothæf gögn sem hafa þýðingu í síðari rannsóknum.

Kjötafurðastöðvum er jafnframt gefinn kostur á að koma á framfæri sjónarmiðum sem nýtast kunna við athugun á því hvernig bregðast skuli við dómi héraðsdóms. Frestur til að svara er gefinn til mánudagsins 25. nóvember næstkomandi.

Afrit af texta bréfanna er aðgengilegt hér .

Hagsmunaaðilum gefinn kostur á að koma að sjónarmiðum

Með tilkynningu þessari vill Samkeppniseftirlitið gefa öllum hagsmunaaðilum og öðrum sem þess óska kost á því að koma á framfæri sjónarmiðum sem nýtast kunna við frekari athugun á því hvernig Samkeppniseftirlitið skuli bregðast við dómi héraðsdóms. Æskilegt er að slík sjónarmið berist eigi síðar en mánudaginn 25. nóvember nk. á netfangið gogn@samkeppni.is

Dómur Héraðsdóms Reykjavíkur, kveðinn upp 18. nóvember 2024, er aðgengilegur hér.

Fyrri frétt Samkeppniseftirlitsins vegna dómsins er aðgengileg hér.