Samkeppniseftirlitið beinir því til Storytel að gæta varúðar

Samkeppniseftirlitið beinir því til Storytel að gæta varúðar í markaðssetningu og verðtilboðum á viðkvæmum tíma þegar nýr aðili reynir fyrir sér á markaði.

Samkeppniseftirlitið hefur haft til skoðunar erindi frá hljóðbókaveitunni Sagnalandi þar sem kvartað var undan meintri misnotkun Storytel á markaðsráðandi stöðu. Sagnaland telur að Storytel hafi brugðist við opnun Sagnalands með því að kynna mun lægra tilboð en samkvæmt hefðbundinni verðskrá fyrirtækisins. Sagnaland vísar til þess að Storytel sé markaðsráðandi á markaðnum og að aðgerðir fyrirtækisins séu til þess fallnar að skaða lítinn keppinaut sem sé að hefja starfsemi á íslenskum hljóðbókamarkaði.

Í erindinu sagði:

„Þó að samkeppni sé alla jafna af hinu góða fyrir neytendur þá vakna spurningar um hvort svo ör og sértæk verðviðbrögð af hálfu markaðsráðandi aðila með yfir 50.000 notendur (sá eini á Íslandi) geti talist til ótilhlýðilegra viðskiptahátta, sérstaklega ef markmiðið er að hindra innkomu nýrra aðila á hljóðbókamarkaðinn.“

Samkeppniseftirlitið sendi Storytel bréf þar sem tilkynnt var að til skoðunar væri að taka bráðabirgðaákvörðun vegna meintrar skaðlegrar undirverðlagningar Storytel. Þá var óskað eftir nánari upplýsingum frá fyrirtækinu og sjónarmiðum þess. Í bréfinu benti Samkeppniseftirlitið á að afleiðingar undirverðlagningar markaðsráðandi fyrirtækis geti verið að veikari keppinautar sjái ekki ástæðu til að taka þátt í samkeppni og geti neyðst til að hætta starfsemi. Sérstaklega alvarlegt þyki þegar fyrirtæki með áberandi sterka stöðu á markaði beitir undirverðlagningu í tengslum við innkomu nýs samkeppnisaðila sem er að reyna að ná fótfestu á markaði.

Í svörum Storytel kom m.a. fram að fyrirtækið teldi sig ekki vera markaðsráðandi og hafnaði því að umrætt tilboð, sem hafi beinst að takmörkuðum hópi fyrrum áskrifenda, hafi falið í sér skaðlega undirverðlagningu.

Eftir athugun á gögnum málsins telur Samkeppniseftirlitið að ekki séu á þessu stigi forsendur til að taka bráðabirgðaákvörðun vegna erindisins. Við mat á því hvort tilefni væri til að taka bráðabirgðaákvörðun var m.a. litið til þess að Storytel lagði fram gögn sem gáfu til kynna að umræddu tilboði hafi ekki sérstaklega verið beint að innkomu Sagnalands á markað.

Hins vegar hefur Samkeppniseftirlitið brýnt fyrir Storytel að huga að stöðu sinni á markaðnum og gæta sérstakrar varúðar í markaðssetningu og tilboðum til viðskiptavina á samkeppnislega viðkvæmum tíma þegar nýr aðili reynir að ná fótfestu á markaði.

Samkeppniseftirlitið kann eftir sem áður að taka málið til frekari rannsóknar á síðari stigum, ef ástæða þykir til. Jafnframt hefur Samkeppniseftirlitið háttsemi Storytel til rannsóknar í öðru máli, þar sem m.a. er til skoðunar hvernig skilgreina beri þá markaði sem Storytel starfar á.

Bakgrunnsupplýsingar:

Samkeppniseftirlitinu er heimilt að taka ákvarðanir til bráðabirgða um einstök mál ef:

a) Sennilegt þykir að sú háttsemi eða þær aðstæður sem til athugunar eru fari gegn ákvæðum samkeppnislaga eða ákvörðunum teknum á grundvelli þeirra eða ef athafnir opinberra aðila hafa skaðleg áhrif á samkeppni og

b) líklegt er að bið eftir endanlegri ákvörðun Samkeppniseftirlitsins leiði til röskunar á samkeppni sem verði afstýrt með endanlegri ákvörðun eða málið að öðru leyti þolir ekki bið.

Lesa má bréf sem Samkeppniseftitlitið sendi frá sér vegna þessa hér.