Samkeppniseftirlitið stóð á dögunum fyrir morgunverðarfundi
undir yfirskriftinni „Áhrif samkeppni á hagvöxt og launakjör“. Fundurinn
fór fram á Grand Hótel í Reykjavík en aðalfyrirlesari var Fiona Scott Morton,
hagfræðiprófessor við Yale-háskóla í Bandaríkjunum.
Fiona er með yfirgripsmikla reynslu á þessu sviði en hún er
með doktorsgráðu frá Tækniháskólanum í Massachusetts (MIT) og hefur einblínt á
samkeppnishagfræði í rannsóknum sínum. Þá starfaði Fiona um skeið sem
aðalhagfræðingur samkeppnisdeildar dómsmálaráðuneytis Bandaríkjanna (Department
of Justice) sem meðal annars fer með framkvæmd á þarlendum samkeppnislögum.
Í erindi sínu fjallaði Fiona meðal annars um rannsóknir á
jákvæðum áhrifum samkeppni og samkeppniseftirlits á vinnumarkaði, þar með talið á kaup
og kjör starfsfólks. Í erindi hennar kom fram að niðurstöður rannsókna bentu til þess að fyrirtæki með markaðsstyrk
nýttu sér hann í samningum við starfsfólk. Þá hefðu stjórnvöld ýmsar leiðir til
þess að bregðast við samkeppnishamlandi hegðun fyrirtækja gagnvart starfsfólki
og þörf væri á virkri framfylgd samkeppnislaga að þessu leyti.
Gylfi Magnússon, hagfræðiprófessor við Háskóla Íslands,
steig í pontu á eftir Fionu og varpaði ljósi á erindi hennar og tengdi það við
íslenskan veruleika og þá sérstaklega þýðingu þess fyrir lítil, opin hagkerfi á
borð við það íslenska.
Í erindi sínu lýsti Gylfi stöðunni í íslensku atvinnulífi og
bar saman fyrirtæki sem eiga í samkeppni á alþjóðlegum vettvangi og fyrirtæki
sem njóta yfirburðarstöðu á innlendum markaði. Þá rakti Gylfi þær áskoranir sem
fylgja fákeppnismörkuðum á borð við þann íslenska og mikilvægi kröftugs samkeppniseftirlits
sem væri byggt á öflugri löggjöf.
Í lok fundar flutti Lilja Dögg Alfreðsdóttir, menningar- og
viðskiptaráðherra, ávarp en neðst í fréttinni má nálgast upptöku af fundinum í
heild.
Að ráðstefnunni lokinni hélt Samkeppniseftirlitið vinnustofu
um stjórnunar- og eignatengsl í íslenskum sjávarútvegi. Á vinnustofuna mætti
forsvarsfólk og fulltrúar ýmissa stofnana og ráðuneyta sem hafa með þessi mála
að gera og sköpuðust gagnlegar og áhugaverðar samræður.
"*" gefur til kynna skyldusvið
