Samkeppniseftirlitið óskar eftir sjónarmiðum vegna kaupa Ljósleiðarans á stofnneti og tengdum búnaði af Sýn

Samkeppniseftirlitið hefur til rannsóknar fyrirhuguð kaup
Ljósleiðarans ehf. á stofnneti og tengdum búnaði af Sýn hf. Fullnægjandi
samrunatilkynning barst Samkeppniseftirlitinu 15. mars síðastliðinn. Afrit
samrunatilkynningar án trúnaðarupplýsinga má finna neðst í þessari frétt.

Ljósleiðarinn er fjarskiptafyrirtæki sem starfar á íslenskum
heildsölumörkuðum fyrir fjarskiptaþjónustu. Kjarnastarfsemi fyrirtækisins felst
í rekstri ljósleiðaranets og sölu á vörum og þjónustum á ljósleiðaraneti
Ljósleiðarans til fjarskiptafélaga að sögn félagsins.

Samruninn leiðir til þess að Ljósleiðarinn eignast stofnnet
Sýnar en auk þess hafa samrunaaðilar undirritað þjónustusamning um heildsöluviðskipti.

Rannsókn Samkeppniseftirlitsins á samkeppnislegum áhrifum
samrunans beinist einkum að áhrifum samrunans á samkeppni og hvort hann feli í
sér aukna sameiginlega hlutdeild samrunaaðila á tilteknum sviðum fjarskipta eða
að samkeppni raskist að öðru leyti.

Þeim sem þess óska er hér með boðið að koma á framfæri
skriflegum sjónarmiðum um samrunann og aðrar athugasemdir sem geta skipt máli
við rannsóknina.

Er óskað eftir að slík sjónarmið berist
Samkeppniseftirlitinu eigi síðar en föstudaginn 31. mars á
netfangið samkeppni@samkeppni.is.

• Samrunatilkynning án trúnaðarupplýsinga er aðgengileg hér.