Ný lög um breytingar á lögum um virðisaukaskatt og samkeppnislögum , voru samþykkt á Alþingi í gær 29. apríl. Þau fela í sér tímabundna lækkun á virðisaukaskatti úr 24 prósentum í 11 prósent. Með þessari lækkun er brugðist við áhrifum stríðsátaka í Miðausturlöndum á eldsneytisverð. Lögð er áhersla á að lækkunin „skili sér að fullu til neytenda í endanlegu útsöluverði eldsneytis“, eins og segir í frumvarpinu. Tekur lækkunin til tímabilsins frá og með 1. maí til og með 31. ágúst á þessu ári.
Samkvæmt lögunum er Samkeppniseftirlitinu falið það hlutverk að fylgjast með því að lækkunin skili sér til neytenda á tímabilinu.
Samkeppniseftirlitið undirbýr nú eftirlit á grundvelli hinna nýsettu laga. Eftir helgi mun eftirlitið senda eldsneytisfyrirtækjunum bréf þar sem óskað verður tiltekinna upplýsinga sem nauðsynlegar eru. Jafnframt verður lögð á fyrirtækin reglubundin upplýsingaskylda út tímabilið.
Í tengslum við framangreinda upplýsingaöflun mun Samkeppniseftirlitið móta nánar hvernig staðið verður að eftirlitinu, þ. á m. hvaða viðmið verði lögð til grundvallar. Verður seljendum eldsneytis, ásamt þeim sem gæta hagsmuna neytenda eins og ASÍ (Alþýðusamband Íslands), FÍB (Félag íslenskra bifreiðaeigenda) og stjórnvöldum á þessu sviði, gefinn kostur á að tjá sig um tilhögun eftirlits og viðmið sem byggt verður á.
Sjá frekari upplýsingar um eftirlit vegna lækkunar virðisaukaskatts hér.
"*" gefur til kynna skyldusvið
