Samkeppniseftirlitið hefur til meðferðar samruna Heklu og Bílson. Hekla er umboðsaðili á Íslandi fyrir Audi, Volkswagen, Skoda, GWM og Mitsubishi og þjónustar jafnframt umræddar tegundir á verkstæði félagsins. Einnig flytur félagið inn upprunalega (e. original) varahluti fyrir framangreindar tegundir og að óverulegu leyti almenna (e. after market) varahluti skv. samrunaskrá. Bílson rekur bifreiðaverkstæði í Reykjavík og starfar sem viðurkenndur þjónustuaðili fyrir Heklu vegna Volkswagen, VW atvinnubíla og Skoda.
Tilkynning vegna samrunans, þar sem tilkynnendur lýsa samrunanum og samkeppni frá sjónarhorni samrunaaðila, er aðgengileg hér.
Öllum hagaðilum og öðrum áhugasömum er hér með veitt tækifæri til þess að koma á framfæri sjónarmiðum vegna samrunans, svo sem um möguleg áhrif hans á samkeppni, aðstæður á viðgerðarmörkuðum og öðrum tengdum mörkuðum, og um önnur atriði sem umsagnaraðili kann að vilja koma á framfæri vegna samrunans.
Umsagnir sendist með tölvupósti á gogn@samkeppni.is og vegna lögbundinna tímafresta í samrunamálum skulu þær berast eigi síðar en þriðjudaginn 28. apríl nk. Einnig er hægt að senda inn gögn í gegnum gagnagátt Samkeppniseftirlitsins hér. Innihaldi umsagnir trúnaðarupplýsingar er mikilvægt að taka slíkt fram og senda einnig eintak þar sem trúnaðarupplýsingar hafa verið fjarlægðar.
Hægt er að lesa nánar um samrunamál og samruna í skilningi samkeppnislaga hér.
"*" gefur til kynna skyldusvið
