Föstudaginn 10. janúar sl. afturkölluðu Styrkás hf. og Kraftur ehf. samrunatilkynningu til Samkeppniseftirlitsins um sameiningu félaganna, en fyrir á Styrkás m.a. félagið Klett sölu og þjónustu ehf. Við afturköllun tilkynningarinnar fellur rannsókn Samkeppniseftirlitsins á samrunanum sjálfkrafa niður.
Samkeppniseftirlitsins hefur nú birt stutta ákvörðun um lyktir málsins, þar sem m.a. er gerð grein fyrir meginefni rannsóknarinnar og meðferð málsins. Úrlausnin er aðgengileg hér.
Af fréttatilkynningu samrunaaðila til fjölmiðla um afturköllun samrunans má ráða að meginástæða hennar hafi verið sú að Samkeppniseftirlitið hafi ekki fallist á þær markaðsskilgreiningar samrunaaðila sem hafi að þeirra sögn átt stoð í framkvæmd hjá framkvæmdastjórn ESB og samkeppnisyfirvöldum á Norðurlöndum.
Rétt er í þessu sambandi að halda því til haga að framangreindar skýringar samrunaaðila eru ekki í fullu samræmi við þær skýringar sem eftirlitinu voru gefnar. Óskuðu samrunaaðilar trúnaðar um þær. Þá er óhjákvæmilegt að taka fram að Samkeppniseftirlitið hafði ekki við rannsókn málsins tekið afstöðu til markaðsskilgreininga í málinu, en rannsókn málsins tók mið af sjónarmiðum aðila í samrunaskrá og fyrirliggjandi fordæmum úr Evrópurétti.
Á hinn bóginn hafði rannsóknin leitt í ljós að samrunaaðilar eru samanlagt stærstu innflytjendur vörubifreiða hérlendis. Fyrirtækið Klettur sala og þjónusta, í eigu Styrkáss, er aðalsöluaðili Scania vörubifreiða hérlendis og rekur tengt verkstæði auk annarrar starfsemi, og Kraftur selur m.a. MAN vörubifreiðar og önnur atvinnutæki og rekur tengt verkstæði.
Er um að ræða mikilvæga atvinnustarfsemi og samkvæmt frummati Samkeppniseftirlitsins virðist heildarstærð hennar nema um 14 milljörðum kr. á ári. Er þá ekki meðtalin viðgerðar- eða viðhaldsþjónusta, sala varahluta eða ásetts búnaðar fyrir vörubifreiðar, önnur þjónusta eða vörusala sem Styrkás / Klettur og Kraftur veita, eða tengd starfsemi í samstæðu Styrkáss og Skeljar fjárfestingafélags. Lýstu umsagnaraðilar yfir áhyggjum af stærð samsteypu Styrkáss og að markaðsráðandi staða gæti myndast með samrunanum.
Við rannsóknina aflaði Samkeppniseftirlitið ítarlegra gagna og umsagna frá markaðsaðilum, auk upplýsinga frá samrunaaðilum sjálfum. Vill eftirlitið þakka fyrirtækjum á viðkomandi mörkuðum fyrir þá vinnu og gögn sem þau lögðu til í þágu rannsóknarinnar.
Að öðru leyti vísast til ákvörðunar nr. 2/2025 .
"*" gefur til kynna skyldusvið
