Við kaup Rapyd Financial
Network (2016) Ltd. (hér eftir „Rapyd“) á Valitor hf., sbr. ákvörðun nr. 13/2022, Samruni
Rapyd og Valitors hf., færðust skilyrði sem hvílt höfðu á Valitor hf. vegna
eldri sátta félagsins við Samkeppniseftirlitið yfir á Rapyd Europe hf.,
dótturfélag Rapyd hérlendis. Skilyrðin fela m.a. í sér að Rapyd Europe þarf að
fylgja tilteknum háttsemisskilyrðum og viðhafa tiltekið skipulag í starfsemi
sinni.
Rapyd Europe
óskaði eftir endurskoðun Samkeppniseftirlitsins á umræddum skilyrðum tveggja
eldri sátta. Þeirri endurskoðun er nú lokið, með því að fyrirtækið hefur gert
nýja heildarsátt við Samkeppniseftirlitið á grunni hinna tveggja eldri sátta.
Í hinni nýju
heildarsátt hafa verið dregin saman öll þau efnisskilyrði úr viðkomandi eldri sáttum
sem enn hafa þýðingu, orðalag hefur verið uppfært og bætt hefur verið við
sérstakri grein sem inniheldur skilgreiningar hugtaka. Samhliða gildistöku
hinnar nýju heildarsáttar falla úr gildi allar kvaðir umræddra eldri sátta sem hvílt
hafa á Rapyd Europe enda koma þær kvaðir sem áfram hafa þýðingu fram í nýju
heildarsáttinni.
Þær tvær eldri
sáttir sem endurskoðaðar hafa verið eru annars vegar sátt, dags. 15. desember
2014, milli Valitors hf. (nú Rapyd Europe) og Samkeppniseftirlitsins, sbr.
ákvörðun eftirlitsins nr. 8/2015, Breytingar á skipulagi og framkvæmd á
greiðslukortamarkaði. Hins vegar er um að ræða sátt, dags. 29.
nóvember 2007, milli Greiðslumiðlunar hf. (síðar Valitor hf. og nú Rapyd
Europe) og Samkeppniseftirlitsins, sbr. ákvörðun eftirlitsins nr. 4/2008, Brot
Greiðslumiðlunar hf., Kreditkorts hf. og Fjölgreiðslumiðlunar hf. á bannákvæðum
samkeppnislaga, með breytingum skv. ákvörðun nr. 34/2008.
Frá því að
framangreindar sáttir voru gerðar hafa sumar forsendur sem lágu þeim til
grundvallar breyst með þeim hætti að ýmis ákvæði þeirra hafa ekki lengur
þýðingu. Þær forsendur sem um ræðir lúta einkum að eignarhaldi sem hefur
gjörbreyst, að innleiðingu á reglugerð ESB um milligjöld og kortatengdar
greiðslur, og að margvíslegri þróun í markaðsumhverfi Rapyd Europe að öðru
leyti. Að mati Samkeppniseftirlitsins er því bæði málefnalegt og viðeigandi að grisja
sáttirnar með þeim hætti sem nú hefur verið gert með því að draga saman þau
ákvæði sem enn hafa þýðingu í nýja heildarsátt. Með því skapast skýrari rammi
utan um þá verndarhagsmuni sem áfram er nauðsynlegt að tryggja. Á þeim
grundvelli er hin nýja umgjörð til þess fallin að stuðla að skilvirkara
eftirliti og framfylgni við skilyrðin.
Að efni til er
hinni nýju heildarsátt fyrst og fremst ætlað að tryggja að Rapyd Europe geti
ekki notið samkeppnisforskots á markaði/mörkuðum fyrir færsluhirðingu hérlendis
á grundvelli hlutverks síns sem útgáfuvinnsluaðili fyrir ýmsar helstu
innlánsstofnanir landsins. Þau ákvæði sáttarinnar sem ekki miða að þessu
markmiði lúta í aðalatriðum almennt að því að styrkja samkeppnislegar
undirstöður markaðarins í ljósi framangreinds hlutverks Rapyd Europe á sviði
útgáfuvinnslu.
"*" indicates required fields
