Í tilefni af tilkynningu Byggðaráðs Rangárþings ytra um mögulega lokun Festi á verslun sinni á Hellu

Byggðaráð
Rangárþings ytra hefur birt yfirlýsingu
varðandi rekstur dagvöruverslunar á Hellu. Er hún sett fram í tilefni af
umfjöllun um mögulega lokun á verslun Festi á Hellu og framkvæmd Festi á sátt
sem félagið gerði við Samkeppniseftirlitið. Nánar er fjallað um sáttina,
forsendur söluskilyrða vegna verslunar á Hellu og rannsókn á mögulegum brotum
Festi hér.

Í yfirlýsingu byggðaráðsins kemur m.a. fram: „Annað
hvort fær Festi hf leyfi til þess að reka hér áfram sína ágætu verslun og þá
gjarnan þannig að bætt verði í og opnuð hér Krónubúð, eða þá að Festi hf snýr
sér að því að selja Kjarvalsverslun sína hér á Hellu til aðila sem teljast
samkeppnisaðilar og hafa til þess nægjanlegt afl.“

Í tilefni
af yfirlýsingu byggðaráðsins vill Samkeppniseftirlitið taka fram eftirfarandi:

Möguleg
áform Festi um að loka verslun sinni á Hellu eru ekki í samræmi við þá sátt og
þau skilyrði sem félagið lagði til þegar
samruni N1 og Festi var heimilaður og samþykkt voru af Samkeppniseftirlitinu.
Markmið skilyrðana voru þvert á móti að koma í veg fyrir að samruninn hefði þau
áhrif að valkostum neytenda myndi fækka, þjónusta versna eða verð hækka.

Engin af
þeim tillögum sem Festi lagði til, og Samkeppniseftirlitið samþykkti, hafði því
það að markmiði að gera stöðu neytenda verri eftir samrunann, heldur þvert á
móti að verja hagsmuni þeirra.

Komi til
lokunar á verslunarinnar á Hellu, án þess að Festi hafi uppfyllt skuldbindingar
sínar að þessu leyti, má vænta þess að Samkeppniseftirlitið taki til skoðunar
hvort lokunin feli í sér brot sáttinni.

Í tilefni
af yfirlýsingunni mun Samkeppniseftirlitið óska eftir fundi með Byggðaráði
Rangárþings til að ræða stöðu málsins með það að markmiði að markmið
sáttarinnar nái fram að ganga og hagsmuna íbúa á svæðinu verði gætt.