Landsréttur staðfestir ógildingu samruna á markaði fyrir myndgreiningarþjónustu

Með dómi Landsréttar í dag var staðfest ógilding
Samkeppniseftirlitsins á samruna Íslenskrar myndgreiningar ehf. og
Læknisfræðilegrar myndgreiningar ehf. Með dóminum er þannig staðfestur dómur
héraðsdóms Reykjavíkur frá árinu 2022. Áður hafði áfrýjunarnefnd samkeppnismála
staðfest ákvörðun Samkeppniseftirlitsins, sbr. ákvörðun þess nr. 35/2020.

Starfsemi samrunaaðila felst í því að veita læknisfræðilega
myndgreiningarþjónustu, en undir hana falla m.a. tölvusneiðmyndarannsóknir,
röntgenrannsóknir, ómun, segulómun og skyggnirannsóknir. Starfsemin hefur mikla
þýðingu fyrir heilbrigðisþjónustu á landinu. Samkeppnisröskun á þessu sviði
getur verið til þess fallin að draga úr gæðum og hækka kostnað við
heilbrigðisþjónustu.

Með samrunanum hefði keppinautum á markaðnum fækkað úr þremur í
tvo og samanlögð markaðshlutdeild samrunaaðila orðið á bilinu 80-100%, eftir
því um hvaða þjónustuþætti er að ræða.

Dómur Landsréttar er aðgengilegur hér.

Fyrri frétt um dóm Héraðsdóms Reykjavíkur er aðgengileg hér.