Samkeppniseftirlitið hefur í dag birt ákvörðun nr. 33/2012 þar sem greint er frá því að SORPA bs., Metan hf., Orkuveita Reykjavíkur og N1 hf. hafi fyrr á þessu ári skuldbundið sig til að breyta starfsháttum sínum við sölu og dreifingu á metangasi og undirgengist reglur sem skapa skilyrði fyrir samkeppni á mörkuðum sem þessu tengjast.
Forsaga málsins er sú að N1 hf. upplýsti Samkeppniseftirlitið um samning N1 hf., SORPU bs., Metans hf. og Orkuveitu Reykjavíkur sem m.a. fjallaði um smásöluverð á metangasi á grundvelli samnings félaganna frá árinu 2007. Í samningnum fólst brot á banni við samráði en í samningnum var m.a. kveðið á um endursöluverð metangass og lágmarks smásöluverð þess á útsölustöðum N1, áður Olíufélagsins hf.
Þar sem N1 hf. hafði frumkvæði að því að upplýsa Samkeppniseftirlitið um tilvist samningsins uppfyllti félagið skilyrði um niðurfellingu sektar, en reglur Samkeppniseftirlitsins nr. 890/2005 kveða á um atvik sem leiða til niðurfellingar sekta eða ákvarðana um að lækka sektir í málum er varða ólögmætt samráð fyrirtækja.
Hin félögin fylgdu í kjölfarið og lauk málinu með sátt þeirra við Samkeppniseftirlitið. Féllust þau á að greiða stjórnvaldssektir að samanlagðri fjárhæð 9 milljón krónur og sæta skilyrðum í starfsemi sinni til þess að örva samkeppni, eins og áður sagði.
Greint hefur verið frá því í fjölmiðlum að keppinautum á markaði fyrir heildsölu og smásölu á metangasi sé að fjölga. Þannig hyggst Olíuverzlun Íslands hf. veita N1 hf. samkeppni í smásölu á metangasi á næstu misserum, enda hefur félagið náð samkomulagi við Metanorku ehf. og Orkuveitu Reykjavíkur um kaup á metangasi. Skiptir þar máli að ekki er lengur starfað eftir samningnum frá 2007 og umrædd félög hafa tekið upp heppilegri starfshætti.
"*" gefur til kynna skyldusvið
