Samkeppniseftirlitið hefur komist að þeirri niðurstöðu að samruni Ferro Zink ehf. og Metal ehf. hindri virka samkeppni og skuli því ógiltur.
Ferro Zink og Metal eru á meðal fárra fyrirtækja hérlendis sem sérhæfa sig í innflutningi og sölu á smíðamálmum með breiðu vöruúrvali málma af margvíslegum stærðum og gerðum. Með því þjónusta báðir samrunaaðilar blikk-, málm- og vélsmiðjur og ýmis iðnfyrirtæki.
Rannsókn Samkeppniseftirlitsins leiðir í ljós að samruninn myndi skapa markaðsráðandi stöðu á mörkuðum fyrir ryðfrítt stál og ál, auk þess sem hann myndi auka samþjöppun og fækka burðugum keppinautum á mörkuðum smíðamálma. Þá myndi samruninn styrkja og festa í sessi einokunarstöðu Ferro Zink á markaði fyrir heitsinkhúðun og auka aðgangshindranir fyrir nýja keppinauta.
Samkeppniseftirlitið telur líklegt að samruninn leiði til hærra verðs og/eða lakari þjónustu fyrir viðskiptamenn. Ekki hefur verið sýnt fram á að mögulegur ávinningur af samrunanum vegi upp á móti skaðlegum áhrifum á markaði eða skili sér til neytenda.
Með hliðsjón af framangreindu er það niðurstaða Samkeppniseftirlitsins að samruninn raski samkeppni með umtalsverðum hætti og sé því andstæður samkeppnislögum.
Ákvörðunarorð: „Kaup Ferro Zink ehf. á Metal ehf. fela í sér samruna í skilningi samkeppnislaga. Með vísan til forsendna þessarar ákvörðunar og með heimild í 17. gr. c samkeppnislaga nr. 44/2005 ógildir Samkeppniseftirlitið samrunann.“
Ítarlegri upplýsingar um ákvörðun Samkeppniseftirlitsins er að finna hér.
"*" gefur til kynna skyldusvið
