Samkeppniseftirlitið veitir Kviku banka heimild til að kaupa færsluhirðingarsamninga úr fórum sameinaðs félags Rapyd og Valitors gegn skilyrðum

Eins og fram kemur í ákvörðun Samkeppniseftirlitsins nr. 14/2022, Kaup Kviku banka á færsluhirðingarsamningum af sameinuðu félagi Rapyd og Valitors, sem
birt er í dag, hefur Samkeppniseftirlitið lokið rannsókn sinni á kaupum Kviku
banka hf. („Kvika“) á færsluhirðingarsamningum úr fórum sameinaðs félags Rapyd
Financial Network (2016) Ltd. („Rapyd“) og Valitors hf.

Eins og fram kom í fréttatilkynningu Samkeppniseftirlitsins vegna samruna Rapyd og Valitors, hafði
Samkeppniseftirlitið þegar metið Kviku hæfan kaupanda að samningunum í
skilningi sáttar sem Rapyd gerði við Samkeppniseftirlitið í tengslum við
samruna Rapyd og Valitors. Með ákvörðun sinni nú heimilar Samkeppniseftirlitið
Kviku formlega að kaupa það tilgreinda magn færsluhirðingarsamninga sem kveðið
var á um að skyldi selt samkvæmt ákvörðun nr. 13/2022, Samruni Rapyd og
Valitors, frá sameinuðu félagi Rapyd og Valitors, gegn skilyrðum sem Kvika
hefur fallist á að hlíta með undirritun aðgreindrar sáttar við
Samkeppniseftirlitið.

Fyrir liggur að Kvika mun tímabundið kaupa tiltekna
þjónustu frá sameinuðu félagi, einkum á sviði tæknilegrar framkvæmdar og
uppgjörs gagnvart alþjóðlegu kortafélögunum. Með sáttinni við
Samkeppniseftirlitið hefur Kvika m.a. skuldbundið sig til þess að færa
framangreind þjónustukaup til annars þjónustuveitanda sem ekki er umsvifamikill
færsluhirðir á íslandi fyrir tiltekin tímamörk. Er þetta mikilvægur liður í því
að tryggja varanlegt samkeppnislegt sjálfstæði Kviku frá sameinuðu félagi.
Jafnframt er m.a. að finna í sáttinni ákvæði sem lúta að því að tryggja að
færsluhirðingarþjónusta Kviku verði ekki rekin í dótturfélagi í eigu bankans
nema að tilteknum skilyrðum fullnægðum.

Telur Samkeppniseftirlitið ekki þörf á frekari íhlutun
vegna kaupa Kviku á umræddum færsluhirðingarsamningum en felast í ákvæðum
téðrar sáttar Kviku við Samkeppniseftirlitið og ákvæðum áðurnefndrar sáttar
Samkeppniseftirlitsins við Rapyd.

Þrátt fyrir að Samkeppniseftirlitið hafi fyrir sitt leyti
metið samruna Rapyd og Valitors ásættanlegan út frá samkeppnissjónarmiði í
ljósi þeirra skilyrða sem Rapyd féllst með gerð sáttar við
Samkeppniseftirlitið, þá skal á það minnt að Fjármálaeftirlit Seðlabanka
Íslands („Seðlabankinn“) hefur kaup Rapyd á Valitor ennþá til skoðunar og eru
kaupin háð því að Seðlabankinn veiti samþykki sitt fyrir þeim. Þar sem sala
færsluhirðingarsamninganna til Kviku byggja á því að af samruna Rapyd og
Valitors verði, eru kaup Kviku á þeim
einnig háð því að Seðlabankinn heimili Rapyd að kaupa Valitor.