Íslandspóstur gengst við því að hafa farið gegn fyrirmælum í sátt

Með ákvörðun
Samkeppniseftirlitsins nr. 10/2020 , sem birt er í dag, er gerð grein fyrir sátt
sem eftirlitið hefur gert við Íslandspóst ohf. vegna brota fyrirtækisins á
skilyrðum sem á félaginu hvíla á grundvelli ákvörðunar nr. 8/2017, Aðgerðir til að styrkja samkeppnisaðstæður á póstmarkaði. 

Með umræddri sátt
gengst Íslandspóstur við því að hafa farið gegn fyrirmælum í sátt félagsins við
Samkeppniseftirlitið frá árinu 2017 og er gert að greiða fimm milljónir króna í
stjórnvaldssektir vegna þessa.

Brot Íslandspósts
tengjast fyrrum dótturfélagi þess, ePósti ehf., og fólust annars vegar í því að
Íslandspóstur hafi ekki óskað eftir samþykki Samkeppniseftirlitsins áður en
rekstur dótturfélagsins ePósts ehf. var færður inn í Íslandspóst og sameining
félaganna komst til framkvæmda og hins vegar því að hafa látið hjá líða að
endurskoða kjör á áður veittri lánsfjármögnun til ePósts, þrátt fyrir að ljóst
hafi verið að kjörin voru undir markaðskjörum sem sambærileg fyrirtæki njóta.

Afar þýðingarmikið
er að fyrirtæki fari að þeim skilyrðum sem þau undirgangast með sátt við Samkeppniseftirlitið.
Á hinn bóginn telur Samkeppniseftirlitið að unnt sé að fallast að einhverju
leyti á þau sjónarmið sem Íslandspóstur hefur sett fram sér til málsbóta í
málinu og voru þau að hluta til höfð til hliðsjónar við ákvörðun sektar.

Bakgrunnsupplýsingar:

Í upphafi árs 2017
gekkst Íslandspóstur undir sátt við Samkeppniseftirlitið sem birt er í ákvörðun
Samkeppniseftirlitsins nr. 8/2017, Aðgerðir
til að styrkja samkeppnisaðstæður á póstmarkaði. Um er að ræða tvíhliða
sátt milli Samkeppniseftirlitsins og Íslandspósts þar sem leitast er við að
leysa til frambúðar úr þeim samkeppnisvandamálum sem kristallast höfðu í
margvíslegum ábendingum og kvörtunum yfir starfsemi félagsins sem borist höfðu
Samkeppniseftirlitinu. Flestar kvartanirnar tengdust beint eða óbeint
grunsemdum keppinauta um að hagnaður úr einkaréttarstarfsemi Íslandspósts hafi
verið nýttur til að víxlniðurgreiða samkeppnisstarfsemi Íslandspósts.

Í sáttinni er m.a. kveðið á
um hvaða starfsemi Íslandspósts skuli rekin í aðskildu dótturfélagi. Var það
m.a. gert í því skyni að afmarka samkeppnisstarfsemi Íslandspósts sem mest frá
einkaréttarvörðu starfseminni. Þá er með nánar tilteknum hætti kveðið á um
rekstrar- og stjórnunarlegt sjálfstæði dótturfélaga og jafnframt innleidd
ítarleg skilyrði varðandi viðskipti Íslandspósts við dótturfélög, einkum í því
skyni að tryggja jafnræði keppinauta dótturfélaga Íslandspósts í viðskiptum við
Íslandspóst. Jafnframt er heimildum Íslandspósts til fjármögnunar á starfsemi
dótturfélaga settar verulegar skorður til þess að samkeppni raskist ekki á þeim
mörkuðum sem dótturfélög Íslandspósts starfa. Þá er kveðið á um það að samþykki
Samkeppniseftirlitsins verði að liggja fyrir áður en rekstur dótturfélags er
færður inn í móðurfélagið, Íslandspóst, og dótturfélag lagt niður. Á grundvelli sáttarinnar var jafnframt sett á
fót sérstök eftirlitsnefndar sem fylgir sáttinni eftir, tekur við kvörtunum og
tekur ákvarðanir í samræmi við fyrirmæli sáttarinnar.