Samkeppniseftirlitinu hefur borist fullnægjandi tilkynning vegna samruna franska sjóðastýringafélagsins Ardian France SA
(„Ardian“) og Mílu ehf. („Mílu“). Með viðskiptunum kaupir eignarhaldsfélag í
eigu Ardian og fjárfestingasjóða þess allt hlutafé Mílu af Símanum hf.
Samkeppniseftirlitið kallaði eftir samrunatilkynningu vegna
samrunans 19. nóvember 2021. Samruninn reyndist vera tilkynningarskyldur
og barst samrunatilkynning frá aðilum þann 19. janúar síðastliðinn. Í
kjölfarið fór fram skoðun á tilkynningunni og mat á því hvort að hún innihéldi
allar nauðsynlegar upplýsingar eins og reglur kveða á um. Átti
Samkeppniseftirlitið í samskiptum við fyrirtækin vegna þessa og fékk frá þeim
frekari nauðsynlegar upplýsingar.
Tilkynningin var metin fullnægjandi 8. febrúar og því byrjuðu tímafrestir að telja frá deginum í gær. Á sérstakri síðu um stöðu samrunamála
má lesa nánar um tímafresti í samrunamálum auk þess sem þar má finna stöðu
þeirra mála sem eru til rannsóknar hjá Samkeppniseftirlitinu.
Samkeppniseftirlitið hefur
það hlutverk samkvæmt
samkeppnislögum að leggja
mat á það
hvort samruni fyrirtækja raski
samkeppni og skaði
þar með hagsmuni
almennings. Liður í
slíkri rannsókn er
að afla sjónarmiða fyrirtækja sem
eftir atvikum eru keppinautar eða viðskiptavinir samrunaaðila.
Hér má nálgast samrunatilkynningu Ardian og Mílu án trúnaðarupplýsinga.
Samkeppniseftirlitið
býður öllum hagsmunaaðilum og öðrum áhugasömum að senda inn umsögn um samrunann
og möguleg áhrif hans, sér í lagi um það hvaða áhrif umsagnaraðili telur að
sala Mílu hafi á samkeppni, um markaðsskilgreiningar, lóðrétt tengsl Símans og
Mílu vegna langtíma heildsölusamnings eftir samrunann og fleira.
Vegna
lögbundinna tímafresta sem hvíla á Samkeppniseftirlitinu við meðferð
samrunamála er þess óskað að sjónarmið berist á netfangið samkeppni@samkeppni.is eigi
síðar en mánudaginn 21. febrúar.
