Kvörtun yfir starfsemi Útfararstofu Kirkjugarðanna

„Með vísan til 2. mgr. 14. gr. og 17. gr. laga nr. 8/1993 mælir
Samkeppnisráð fyrir um að aðskilnaður milli rekstrar Útfararstofu
Kirkjugarðanna og starfsemi Kirkjugarða Reykjavíkurprófastsdæma skuli fara fram
með eftirfarandi hætti eigi síðar en 1. janúar 1997:

1. Útfararstofa Kirkjugarðanna skal færa árlega til gjalda og greiða
markaðsvexti af stofnframlagi til Kirkjugarða Reykjavíkurprófastsdæma samkvæmt
mati löggilts endurskoðanda.

2. Kirkjugarðsstjórn skal skipa sérstaka framkvæmdastjórn fyrir
Útfararstofuna. Framkvæmdastjórnin ræður framkvæmdastjóra fyrir Útfararstofuna.
Framkvæmdastjórn Útfararstofunnar skal ekki skipuð sömu mönnum og
framkvæmdastjórn Kirkjugarðanna og sami maður skal ekki gegna starfi
framkvæmdastjóra Útfararstofunnar og Kirkjugarðanna. Laun framkvæmdastjórnar og
framkvæmdastjóra Útfararstofunnar skulu greidd af Útfararstofu Kirkjugarðanna.

3. Kirkjugörðum Reykjavíkurprófastsdæma er ekki heimilt að greiða
hugsanlegt rekstrartap Útfararstofunnar, eða leggja fram frekara stofnframlag
til fyrirtækisins, meðan það er í samkeppnisrekstri.

4. Öll viðskipti milli Útfararstofu Kirkjugarðanna og Kirkjugarða
Reykjavíkurprófastsdæma skulu vera eins og um viðskipti milli óskyldra aðila
væri að ræða og skal greiða markaðsverð fyrir vörur og þjónustu sem annar
aðilinn selur hinum.

5. Útfararstofa Kirkjugarðanna skal breyta heiti
sínu á þann veg að tengsl fyrirtækisins við Kirkjugarða Reykjavíkurprófastsdæma
séu ekki sjáanleg í nafni þess. Einnig verði tengsl í kynningar- og
markaðsstarfi rofin.“

Í úrskurði áfrýjunarnefndar nr.
14/1996 var ákvörðun að mestu staðfest. Málinu var skotið til dómstóla. Sjá dóm
Hæstaréttar í máli nr. 156/1997 (9.10.1997)