Yfirráð Arion banka hf. yfir AFLi-sparisjóði ses.

Málið varðar yfirráð Arion banka hf. á AFLi sparisjóði ses. sem urðu virk við afnám á takmörkunum samþykkta sjóðsins varðandi meðferð atkvæðisréttar stofnfjárhafa. Starfsemi Arion banka felst í alhliða bankaþjónustu og er bankinn með starfsemi um allt land. AFL sparisjóður er stærsti sparisjóður landsins, sem nú er starfandi, með útibú á Siglufirði og Sauðárkróki.

Með sátt við Samkeppniseftirlitið hefur Arion banki fallist á að selja eignarhlut sinn í sparisjóðnum í opnu söluferli og tryggja áframhaldandi starfssemi sparisjóðsins og sjálfstæði hans á meðan söluferlinu stendur. Að mati Samkeppniseftirlitsins er þessi niðurstaða fullnægjandi í ljósi erfiðrar fjárhagsstöðu sjóðsins sem lýsir sér m.a. í því að hann uppfyllir ekki lágmörk Fjármálaeftirlitsins um eiginfjárhlutfall.