Samkeppniseftirlitið hefur að undanförnu haft til ítarlegrar
rannsóknar fyrirhuguð kaup Ferðaskrifstofu Íslands (FÍ) á rekstri Heimsferða.
Rannsóknin var á lokastigi en FÍ hefur nú afturkallað samrunatilkynningu sína.
Felur afturköllunin í sér að umræddu máli er lokið án
ákvörðunar og að samruni FÍ og Heimsferða getur ekki komið til framkvæmda að
óbreyttu.
Samrunaaðilar hafa hins vegar upplýst Samkeppniseftirlitið
um að þeir hyggist tilkynna aftur um samrunann á breyttum grunni og leggja til
skilyrði sem eytt geta mögulegum samkeppnishindrunum vegna samrunans. Um er að
ræða tillögur sem ekki voru settar fram við fyrri meðferð málsins og hefur eftirlitinu
því ekki gefist tækifæri til þess að taka afstöðu til þeirra.
Bakgrunnsupplýsingar
Samruna yfir tilteknum veltumörkum ber að tilkynna
Samkeppniseftirlitinu og ber eftirlitinu að taka afstöðu til þeirra innan
tiltekinna lögbundinna tímafresta. Samrunatilkynning vegna þessa máls barst
Samkeppniseftirlitinu 21. janúar 2021. Hefur rannsókn eftirlitsins verið
umfangsmikil, en vegna sjónarmiða samrunaaðila þurfti m.a. að taka
skilgreiningu markaða í málinu til ítarlegrar rannsóknar, s.s. með því að
framkvæma könnun á meðal viðskiptavina félaganna.
Samkeppniseftirlitið birti samrunaaðilum frummat sitt í
andmælaskjali þann 10. júní 2021. Þar var samrunaaðilum gerð grein fyrir því
frummati Samkeppniseftirlitsins að samruni FÍ og Heimsferða væri skaðlegur
samkeppni samkvæmt 17. gr. c samkeppnislaga nr. 44/2005. Var samrunaaðilum
gefið færi á að tjá sig um efni andmælaskjalsins og setja fram hugmyndir um
möguleg skilyrði.
Samrunaaðilar andmæltu frummati Samkeppniseftirlitsins, en
settu jafnframt fram tillögur að skilyrðum sem Samkeppniseftirlitið mat
ófullnægjandi, að undangenginni rannsókn.
Með því að afturkalla samrunatilkynningu hafa samrunaaðilar
komið í veg fyrir mögulega íhlutun af hálfu Samkeppniseftirlitsins með
ógildingu samruna. Þess í stað hyggjast samrunaaðilar láta reyna á hvort unnt
sé að heimila samrunann á grundvelli nýrra tillagna að skilyrðum sem eytt geta
mögulegum samkeppnishindrunum. Verður meðferð þess máls hraðað eins og kostur
er.
"*" indicates required fields
