Stjórnskipunar- og eftirlitsnefnd birtir álit um stjórnsýsluúttekt Ríkisendurskoðunar

Á heimasíðu
Alþingis hefur verið birt nefndarálit meirihluta stjórnskipunar- og
eftirlitsnefndar vegna skýrslu Ríkisendurskoðunar um stjórnsýsluúttekt á
Samkeppniseftirlitinu. Nefndarálitið er aðgengilegt hér.

Þegar skýrsla
Ríkisendurskoðunar kom út opnaði Samkeppniseftirlitið upplýsingasíðu
á heimasíðu sinni og birti verkefnaáætlun vegna tilmæla og ábendinga sem fram
komu í skýrslunni. Einnig bauð eftirlitið hagaðilum að koma sjónarmiðum á
framfæri.

Í tilefni af
nefndaráliti stjórnskipunar- og eftirlitsnefndar hefur verkefnaáætlunin og
upplýsingasíðan nú verið uppfærð. Hin uppfærða verkefnaáætlun er aðgengileg hér.

Nánar um
nefndarálitið

Í
nefndarálitinu er fjallað um þá meginniðurstöðu Ríkisendurskoðunar að
málsmeðferðartími samrunamála hafi ekki verið óeðlilega langur eða viðvarandi
veikleikar í afgreiðslu þeirra. Hins vegar er vikið að ýmsum atriðum í starfi
Samkeppniseftirlitsins og niðurstöðum Ríkisendurskoðunar.

Meðal annars er
hvatt til þess að eftirlitið leggi áframhaldandi áherslu á fræðslu til
fyrirtækja og annarra hagaðila. Einnig er hvatt til þess að forviðræður í
samrunamálum verði útfærðar frekar með aukna skilvirkni rannsókna að
leiðarljósi. Fjallað er um skipun ráðuneytis á stjórn og mikilvægi þess að
standa vörð um sjálfstæði eftirlitsins. Ennfremur er fjallað um skipun
eftirlitsaðila við framkvæmd á sáttum sem Samkeppniseftirlitið gerir við
fyrirtæki og mælst til þess að útfæra mikilvæg atriði um eftirlitsaðila nánar í
verklagsreglum.

Þá er gert að
umtalsefni að mikilvægt sé að tryggja að Samkeppniseftirlitið sé ekki háð
sjónarmiðum eða umsögnum annarra opinberra aðila um stöðu tiltekinna markaða,
enda hafi aðrir opinberir aðilar hagsmuna að gæta sem Samkeppniseftirlitið
þurfi að hafa burði til að leggja sjálfstætt mat á.

Að lokum er
lýst yfir ánægju með að eftirlitið hafi opnað upplýsingasíðu og birt
verkefnaáætlun vegna tilmæla Ríkisendurskoðunar.