Samkeppniseftirlitið hefur um þessar mundir til athugunar
hvort og þá hvernig gera megi verklag við rannsóknir samrunamála enn
skilvirkari. Meðal annars er til skoðunar hvort efni séu til breytinga á reglum um
tilkynningu og málsmeðferð í samrunamálum, sem eftirlitið setur samkvæmt
samkeppnislögum.
Af þessu tilefni efndi Samkeppniseftirlitið í gær (16.
október) til fundar með lögmönnum sem komið hafa fram fyrir hönd
samrunafyrirtækja gagnvart eftirlitinu frá upphafi árs 2018. Var fundurinn vel
sóttur en um milli 40 og 50 manns tóku þátt. Var fundurinn liður í fundarröð
sem Samkeppniseftirlitið hefur haldið undanfarin ár undir heitinu Samtal um samkeppni.
Fyrir fundinum lá minnisblað þar sem gefið er yfirlit
yfir fjölda samrunamála og aðrar tölulegar upplýsingar um rekstur þeirra. Þá er
í minnisblaðinu kallað eftir viðbrögðum um mögulegar breytingar á umgjörð og
verklagi samrunarannsókna. Minnisblaðið er aðgengilegt hér.
Samkeppniseftirlitið hvetur alla áhugasama til að koma á
framfæri ábendingum um það sem betur mætti fara í meðferð samrunamála og
mögulegar breytingar á verklagi og reglum sem miða að aukinni skilvikni. Í
framhaldinu mun eftirlitið kynna frekari tillögur.
