Vegna umfjöllunar um málefni Festi á forsíðu Fréttablaðsins

Í viðtali Fréttablaðsins við framkvæmdastjóra Samtaka
atvinnulífsins á forsíðu Fréttablaðsins í dag kallar hann eftir „stjórnsýsluúttekt
á framferði Samkeppniseftirlitsins“, sem m.a. þurfi „að svara áleitnum
spurningum um ákvarðanir tengdar verslun Festar hf. á Hellu og óhóflegan
kostnað af kunnáttumanni“. Kemur fram að „Festi hafi ítrekað gert
efnislegar og rökstuddar athugasemdir við störf óháða kunnáttumannsins og
gagnrýnt óhóflega þóknun sem hann hefur krafið félagið um.“

Í þágu upplýstrar umræðu um samkeppnismál er rétt að
eftirfarandi komi fram:

• Í samræmi við eftirlitsskyldur sínar gagnvart
  kunnáttumanni hefur Samkeppniseftirlitið í tvígang aflað upplýsinga um hvort
  Festi hafi gert athugasemdir við kunnáttumann vegna kostnaðar sem fyrirtækið
  hefur borið af störfum hans. Hefur Samkeppniseftirlitið fengið staðfest að
  Festi hafi ekki gert athugasemdir við kunnáttumanninn, svo sem vegna
  tímaskýrslna eða vinnubragða, að undanskyldu einu tilviki þar sem gerð var athugasemd
  við færslu einnar vinnustundar á reikningi sem átti að færast á annan lögaðila.

• Samkeppniseftirlitið hefur veitt fyrirtækjum
  leiðbeiningar um kostnaðaraðhald vegna vinnu óháðra kunnáttumanna /
  eftirlitsnefnda sem starfað hafa samkvæmt sáttum sem fyrirtæki hafa gert við
  eftirlitið. Leiðbeiningarnar eru aðgengilegar hér.

• Berist Samkeppniseftirlitinu rökstuddar kvartanir
  vegna starfa kunnáttumanns, þar á meðal vegna kostnaðar, mun eftirlitið taka
  erindið til meðferðar og í framhaldinu taka afstöðu til þess. Felli Festi sig
  ekki við niðurstöðu eftirlitsins getur fyrirtækið borið hana undir
  áfrýjunarnefnd samkeppnismála eða dómstóla. Með þessum hætti er réttaröryggi
  fyrirtækisins tryggt til hins ítrasta og málum af þessu tagi skapaður
  lögbundinn farvegur.

• Minna má á að Festi hefur í einu tilviki borið
  ákvörðun þessu tengdu undir áfrýjunarnefnd samkeppnismála, sbr. úrskurð í
  máli nr. 5/2019. Í málinu krafðist Festi ógildingar á ákvörðun
  Samkeppniseftirlitsins um að óháðum kunnáttumanni væri heimilt að afla sér
  utanaðkomandi sérfræðiaðstoðar vegna mats á skilmálum og verðskrá
  Olíudreifingar ehf. eftir viðmiðum sáttarinnar. Áfrýjunarnefnd hafnaði kröfu
  Festi í málinu. Rétt er að taka fram í þessu sambandi að Festi hefur gert tvo
  sjálfstæða verksamninga við sérfræðinga sem hafa verið kunnáttumanni til
  aðstoðar, annars vegar vegna mats á gjaldskrá Olíudreifingar og hins vegar
  vegna aðgengis að heildsölu N1 og verðskrá félagsins.

• Á starfstíma kunnáttumanns hefur Festi ekki beint öðrum
  formlegum erindum til Samkeppniseftirlitsins vegna starfa hans eða kostnaðar af
  þeim völdum. Á aðalfundi Festi í síðustu viku kom fram að Festi muni „í
  framhaldi aðalfundar óska eftir breytingum á aðkomu óháðs kunnáttumanns að sátt
  félagsins við Samkeppniseftirlitið“. Erindi þetta hefur ekki borist
  Samkeppniseftirlitinu. Berist erindið verður það tekið til meðferðar samkvæmt
  framangreindu.

Til viðbótar við framangreint vísar Samkeppniseftirlitið til
fyrri umfjöllunar um þessi mál, sbr. tilkynningu
dags. 24. mars sl. og tilkynningu
dags. 25. mars 2020.